പ്രശ്നങ്ങൾ

പ്രശ്നങ്ങളില്ലാത്തോരാരുണ്ടീ ഭൂമിയിൽ 
പ്രശ്നങ്ങൾ, പ്രശ്നങ്ങളാകാതെ നോക്കണം 
പ്രശ്നങ്ങളില്ലാത്ത ജീവിതമില്ല, വൻ -

പ്രശ്നങ്ങൾ ദൂരീകരിക്കാൻ ശ്രമിക്ക നാം.

പ്രശ്നങ്ങളൊക്കെയും ചോദ്യചിഹ്നങ്ങൾപോൽ,
മർത്ത്യന്റെപാത തടസ്സപ്പെടുത്തവേ
പ്രശ്നങ്ങളുണ്ടാവുമെന്നൊരു നേർച്ചിന്ത
പ്രശ്നപരിഹാരമേകാൻ തുണച്ചിടും

പ്രശ്നങ്ങൾ പ്രശ്നങ്ങളാക്കി മാറ്റും മൂഢർ
ഉത്തരം കാണാൻ ശ്രമിക്കും മിടുക്കരും, 
പ്രശ്നങ്ങളെന്നെന്നും നിൽക്കുകില്ലാ, കർമ്മ -
പുഷ്പകവാടിതൻമുള്ളുകളാണവ

പ്രശ്നങ്ങൾ മുൻകൂട്ടി കാണാത്ത ജോലികൾ
പ്രശ്നമായ് ത്തന്നെ ഭവിച്ചിടും നിത്യവും
പ്രശ്നങ്ങളോർക്കിലോ മാർഗ്ഗമെളുപ്പമാം 
പ്രശ്നങ്ങൾ പ്രശ്നമാകാതെ വരും ദൃഢം.

പ്രശ്നമലക്കുയന്ത്രംപോലെയാരെയും
ചുറ്റിക്കശക്കിക്കറക്കുന്നുവെങ്കിലും 
വൃത്തിയിലെല്ലാം പുറത്തുവരുംനേരം 
ശുദ്ധമായ്, വെണ്മയായ്ത്തീരുന്നു സർവ്വതും.

പ്രശ്നങ്ങളെല്ലാം സ്വയംകൃതമോർക്കണം 
ശ്രദ്ധവെച്ചാൽ പ്രശ്നമെല്ലാമകറ്റിടാം
പ്രശ്നങ്ങളെ പ്രശ്നമാക്കാതിരിക്കുവാൻ
പ്രശ്നാരിയെ കണ്ടിടാതങ്ങിരിക്കണം.

***********
 വൈക്കം ശ്രീരാമൻ   )